ಲಂಚಕ್ಕಾಗಿ ಕಿರುಕುಳ: ರೊಟ್ಟಿ ಮಷಿನ್ ಲೈಸನ್ಸ್ ನೀಡಲು ಲಂಚಕ್ಕೆ ಬೇಡಿಕೆ ʻಲೋಕಾʼ ಬಲೆಗೆ ಬಿದ್ದ ಪಾಲಿಕೆ ಮಹಿಳಾ ಆರೋಗ್ಯ ನಿರೀಕ್ಷಕಿ

ಧಾರವಾಡ: ರೊಟ್ಟಿ ಮಷಿನ್ ಲೈಸನ್ಸ್ ನೀಡಲು ಲಂಚಕ್ಕೆ ಬೇಡಿಕೆಯಿಟ್ಟಿದ್ದ ಮಹಾನಗರ ಪಾಲಿಕೆಯ ಮಹಿಳಾ ಆರೋಗ್ಯ ನಿರೀಕ್ಷಕಿಯನ್ನು ಲೋಕಾಯುಕ್ತ ಪೊಲೀಸರು ಬಂಧಿಸಿರುವ ಘಟನೆ ಧಾರವಾಡದಲ್ಲಿ ನಡೆದಿದೆ.

ದೂರುದಾರರಿಂದ 4,500 ಲಂಚ ಸ್ವೀಕರಿಸುತ್ತಿದ್ದ ವೇಳೆ ಅಧಿಕಾರಿ ಹೀನಾ ಕೌಸರ್ ಕುರಹಟ್ಟಿ ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿದ್ದಾರೆ. ಧಾರವಾಡದ ಮಹಾನಗರ ಪಾಲಿಕೆಯ ವಲಯ ಕಚೇರಿ ಒಂದರಲ್ಲಿ ಹೆಲ್ತ್ ಇನ್ಸ್‌ಪೆಕ್ಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಹೀನಾ ಕೌಸರ್ ಕುರಹಟ್ಟಿ ಎಂಬಾಕೆಯೇ ಲೋಕಾಯುಕ್ತರ ಅತಿಥಿಯಾದ ಅಧಿಕಾರಿ. ನಗರದ ಮಳೆಪ್ಪ ತಳವಾರ ಎಂಬುವವರು ತಮ್ಮ ಸ್ವಂತ ಉದ್ಯೋಗಕ್ಕಾಗಿ ‘ರೊಟ್ಟಿ ಮಾಡುವ ಮಷಿನ್’ ಒಂದನ್ನು ಅಳವಡಿಸಿಕೊಳ್ಳಲು ನಿರ್ಧರಿಸಿದ್ದರು. ಈ ಉದ್ಯೋಗಕ್ಕೆ ಪಾಲಿಕೆಯಿಂದ ಅಧಿಕೃತ ಲೈಸನ್ಸ್ ಪಡೆಯಲು ಅವರು ಅರ್ಜಿ ಸಲ್ಲಿಸಿದ್ದರು.

ಲಂಚಕ್ಕಾಗಿ ಕಿರುಕುಳ: ನಿಯಮದಂತೆ ಲೈಸನ್ಸ್ ನೀಡಬೇಕಾದ ಹೆಲ್ತ್ ಇನ್ಸ್‌ಪೆಕ್ಟರ್ ಹೀನಾ ಕೌಸರ್, ಕೆಲಸ ಮಾಡಿಕೊಡಲು ಲಂಚದ ಬೇಡಿಕೆ ಇಟ್ಟಿದ್ದರು. ಕಷ್ಟಪಟ್ಟು ಜೀವನ ಸಾಗಿಸಲು ರೊಟ್ಟಿ ಮಷಿನ್ ಹಾಕಿಕೊಳ್ಳುತ್ತಿದ್ದ ವ್ಯಕ್ತಿಯಿಂದ ಬರೋಬ್ಬರಿ 4,500 ರೂಪಾಯಿ ಲಂಚ ನೀಡುವಂತೆ ಪೀಡಿಸುತ್ತಿದ್ದರು ಎನ್ನಲಾಗಿದೆ. ಹಣ ನೀಡದ ಹೊರತು ಲೈಸನ್ಸ್ ಪ್ರಕ್ರಿಯೆ ಮುಂದೆ ಹೋಗುವುದಿಲ್ಲ ಎಂಬ ಧಾಟಿಯಲ್ಲಿ ಅಧಿಕಾರಿ ವರ್ತಿಸಿದ್ದರು.

ಲೋಕಾಯುಕ್ತರ ದಾಳಿ: ಅಧಿಕಾರಿಯ ಲಂಚದ ಬೇಡಿಕೆಯಿಂದ ಬೇಸತ್ತ ಮಳೆಪ್ಪ ತಳವಾರ ಅವರು ಧಾರವಾಡ ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದರು. ಯೋಜನೆಯಂತೆ ಇಂದು ಹಣ ಪಡೆಯುತ್ತಿದ್ದ ವೇಳೆ ಲೋಕಾಯುಕ್ತ ಅಧಿಕಾರಿಗಳು ಹಠಾತ್ ದಾಳಿ ನಡೆಸಿದ್ದಾರೆ. ಲಂಚದ ಹಣ 4,500 ರೂ.ಗಳನ್ನು ಸ್ವೀಕರಿಸುತ್ತಿದ್ದಾಗಲೇ ಹೀನಾ ಕೌಸರ್ ಅವರನ್ನು ರೆಡ್ ಹ್ಯಾಂಡ್ ಆಗಿ ಹಿಡಿಯಲಾಗಿದೆ.